Пагалыме марий калык!

Мер Каҥаш лӱм дене чыландамат шушаш у 2019 ий дене да Шорыкйол дене саламлем!

Идалык мучаште ыштыме пашам иктешлат. 2018 ийыш савырнен ончалаш гын, ятыр паша шукталтын. Кок Марий форум (Йошкар-Олаште да Кировыште), кок пленум да вуйверын 8 каҥашпогынжо эртаралтыныт. Нуно марий йылмым, тӱвырам, йӱлам аралыме да вияҥдарен колтымо дене кылдалтше лийыныт. Тидын дечын посна ме, Мер Каҥашын еҥже-влак, марий калыкын тÿшкан илыме кундемлашке лектын коштынна. Тÿрлö мероприятийым, семинарым эртаренна. Кугу паша мемнам ончылнат вуча.

Посна шомакым Марий Эл деч ӧрдыжсӧ марий активлан каласыме шуэш. Те марий калыкын онжо – лидерже улыда. Умбакыжат шке кундемыштыда марий калыкым чумырышо, вияҥдыме пашам шуктыза. Тек тыршымыда моло калыклан пример лиеш. Тек марий-влакым ик эн виян да шотан калык семын аклат.

У ий — калыкын ик эн вучымо да йӧратыме пайремже. Тудо чонышто умылтарен мошташ лийдыме куан тулым чӱкта, сай ончыкылыклан ӱшаным пуа.

Шушаш ийыште уло марий калыклан пеҥгыде тазалыкым, кужу ÿмырым, вашла пагалымашым да пиалым тыланем. Тек 2019 ий тыланда сай паша лектышым, чон ласкалыкым конда.

 Умбакыжат марий калыкнан волгыдо ончыкылыкшо верч пырля тыршаш ÿжам. Чыла поро шонымашда шушаш ийыште шукталтше.

У ий дене! Шорыкйол дене!

 

Марий Оньыжа

Эдуард Васильевич Александров.