Тидымак каласаш лиеш «Ломбо» нерген. Южыжо тиде калык муро манын шона. Уке, тудын авторжо уло: мутшымат, семжымат Анфиса Чикаева (кызыт – Эманова) возен. Мура шкежак. Кузе ты сылне произведений шочын? Айста Анфисан каласкалымыжым колыштына.

– Авторын мурыжым «Калык муро» маныт гын, тугеже тудо калыкын кумылжым налын. Вет чот келшыше мурым гына калык шкенжынлан шотла.

Тугеже кумло ий ончыч (1990 ийыште) шочшо мыйынат «Ломбо» мурем чонеш пижше, ушеш кодшо. Студент улмына годым тӱшкагудысо  ик  пӧлемыш  погынен шинчына да ятыр йӱд лиймешке гитар почеш мурена ыле. А 1991 ийыште самодеятельный автор- влакын 3-шо Марий муро фестивальыштышт «Ломбо» муремым жюри 3-шо вер дене палемдыш.

Кунам да кузе тудо шочын? Кеч-могай саскалан: лийже кеч почеламут, кеч сылне сӱрет, кеч сем – чылажланат тӱзланашыже йӧратымашын      куатле вийже шӱкалтышым ышта. Тиде мурыланат  шочаш  амалым  йӧратымаш пуэн.   Икымше  йӧратымаш.   Тиде юзо шижмашын кепшылже гыч иктат  ок  утло.  Моло  самырык  еҥ семынак мыйынат илышыште тыгак лийын. Мутшат, семжат лач шӱм-чон вургыжмо пагытыште толкыналт лектыныт.

Тунам Марий кугыжаныш университетын историй да филологий факультетыштыже тунемынам. Латкандаш ияш пагытыште шукыжым шижын от шукто, шке ыштыш-кучышлан чын акым пуэн от мошто. Мыят самырык ушем дене  йӧратымемым  умылен  моштен омыл.

Тӱшкагудына гыч «Дружба» стадионыш кайыме корнысо ик пӧрт тураште   икымше   йӧратымашем дене ойырленна. Тиде верыште пеш сылне ломбо кушкеш ыле. Кажне гана эртен кайымем годым тудо мыланем ойырлымо татым ушештарен. А мыйже ушем дене тудлан йоҥылыш  лиймем  нерген  ойленам. Паленам: ломбо мыйым колыштеш, умыла. Мыняр чӱчкыдын тиде верыште лийынам, тунаре чот чон корштен, вараже ты тураште ала-кӧ пуйто лӱмын семым пылышешем  чӱктен,  уло  кӧргым  пудыратен, «Ломбо-о-о» манын шортын мурен. Солнышо ты йӱкым гитар дене   шокташ   тӱҥальым.   Икана тӱшкагудысо    пӧлемыште    пырля илыше Лена йолташ ӱдыремлан, шоктен,   семым   йоҥгалтарен   ончыктышым. Тудо шыпланыш, нимом ок пелеште. Семым колыштын, шортеш улмаш. Вара семыш мут возо, тыге муро шочо. Мый кызытат тиде верым южгунам эртен каем. Кумло ий жапыште тыште шукыжо вашталтын, ломбымат руэныт, олмыжо гына кодын. Туге гынат тачат кажне гана «Ломбо» манын кычкыралме йӱк пылышемлан солнен кодеш, тачат студент пагытым, тӱнясе эн яндар шижмашым,   икымше   йӧратымашым, шарныкта.

Ирина ЯБЕРДИНА