Шергакан марий калык!

 

Марий Мер Каҥаш лÿм дене Марий тиште кече дене саламлем.

Марий тиште кече уло марий калыкын йылме дене кылдалтше пайремже. 1775 ийыште Петербургышто «Сочинения, принадлежащие к грамматике черемисского языка» книгам савыктен лукмо. Тиде книга марий тиштын тӱҥалтышыжлан шотлалтеш. Тушко чылаже тӱжем наре мутым пуртеныт. Марий Элыште Тиште кече — 1998 ий годсек кугыжаныш пайрем.

Икымше книга гыч тӱҥалын, тачысе кече марте шочмо йылмына пойдаралт толеш. Кызыт марий йылмына дене могай гына книга, мутер возалтын огытыл?! Тидыже калыкнан шерге поянлыкше улмым пеҥгыдемда. Сандене кугезына-влакын арален кодымо йылмышт дене яндарын мутланаш, сылнымут мастар-влакын пашаштым, тыгак савыкталт шогышо газет ден журнал-влакым лудаш кумылан марий еҥым таче марий калыкын поян еҥжылан шотлаш келшен толеш.

Шочмо йылмына эшеат куатле лийже манын, ме, марий-влак, утларак тыршышаш улына. Икшывынам марла кутыраш, возаш туныктышаш улына. А йоча-влаклан марий мутмастар, писатель Тыныш Осыпын сугыньжым ойлынем: «Шочмо йылмым ӧрканыде тунемза! Тендан илышыштыда, коштмо корныштыда шочмо йылме шке вержым налын шогыжо. Тудлан эре шӱман лийза!»

Марий пайрем дене!

Марий Оньыжа Александров Эдуард Васильевич.