Ме манына Морко район, а ушышто – морко памаш. Тыге шонаш шуко амал уло. Тиде мланде гыч памаш вӱд гае виян-яндар калык лектеш. Лӱмлӧ еҥ-влакын лӱмышт гоч тиде раш коеш.

Морко мландыште шочыныт марий сылнымутлан негызым пыштыше Чавайн Сергей Григорьевич да профессионал сӱретче-влакын онжо Егоров Констанин Фёдорович.

Марий автономийым йол ӱмбаке шогалтыме пагытыште эн неле, эн нугыдо пашам шке вакше Шеҥше марий Петров Иван Петрович налын. Манаш веле, кум гана Мароблисполкомым вуйлатен!

Кугу Ачамланде сарыште шуко морко-шамыч ончыл радамыште кредалыныт да чапым суленыт: Краснов Зосим Алексеевич, Павлов Николай Павлович, Соловьёв Василий Иванович Совет Союз Герой лийыныт.

Совет кучемын эн виян да поян жапыштыже кугыжаныш пашаште морко-влак усталык дене ойыртемалтыныт. Краснов Анатолий Васильевич – тӱвыра министрлан шогымыжо годым ятыр шотан-ушан сомыл шукталтын, Марий АССР-ын лӱмжӧ кӱшкӧ кӱзен. Тудым «Министр 20 века» манаш лиеш.

Колумб Валентин Христофорович – «Марий Пушкин».

Мланде да чоҥымо пашаште, туныктымо да тазалыкым аралыме сферыште, тӱвыра, сылнымут, театр, спорт – чыла вере морко калык ойыртемалтеш.

Мер аланыштат морко марий-влак деч посна нигузе ок лий! Куд Марий Оньыжа гыч кумытшо тендан землякда улыт: Пектееев Василий Александрович, Николаев Виктор Леонидович, Иванов Анатолий Николаевич.

Теве тыгай виян-чолга да уста-мотор улыда, морко-шамыч, морко-влак. Тиде спискын мучашыже ыныж лий!

Юбилей дене!

Марий Оньыжа Александров Эдуард Васильевич.