Пагалыме марий калык!

Мер Каҥаш лӱм дене чыладамат ик эн чапланыше, волгыдо да кумылым нӧлтышӧ Пеледыш пайрем дене саламлем.

Тиде пайремын эртыме корныжо кужу да тӱрлӧ шӧрынан. Икымше гана тудым 1920 ийыште Шернурышто Йошкар пеледеш пайрем семын палемденыт. Тыште кугу рольым Шернур педкурсын туныктышо-влак модыныт, нуно шке кокла гыч писатель Александр Конаковым ойыреныт да тудлан тиде сомылым вуйлаташ ӱшаненыт.

Пеледыш пайремым ме поро йӱла почеш шошо ага паша пытымеке палемдена. Туге гынат кызытсе Пеледыш пайрем пеледыш да мланде паша пайрем веле огыл, тиде тыгак марий калыкын йӱлажым умбакыже шуен толмым ончыктышо пайрем, эртыше пагытым да ончыкылыкым ушен шогышо кыл.

Тиде кечын Йошкар-Ола уремлаште Россий кумдыкын ятыр регионжо гыч толшо марий вургеман еҥ-влакым вашлияш лиеш. Палемдыме верлаште марий муро-куштымаш-влак йӧҥгалтыт. Чимарий кучедалмаш, йоча-влаклан марий модыш-влак эртаралтыт.

Пагалыме марий-влак! Айста теният Пеледыш пайремым чолган эртарена. Ончыкыжымат шочмо кундемнам, калыкнам тӱзаташ вийнам огына чамане.

Таза, кужу ӱмыран, пиалан лийза. Пайрем дене!

Оньыжа Эдуард Васильевич Александров.