90 ий дене Анатолий Лупповым.

Луппов Анатолий Борисович. 1929 ий 2-шо июньышто Виче кундем Тужинский районысо Пачи селаште шочын. Изигодсек Совет районысо Ӱшнӱр ялеш кушкын. Садлан лач тиде селам шочмо верлан шотла. Йошкар-Оласе сылнысем училищым (1951), Озаҥысе консерваторийым (фортепиано, 1956; композиция, 1959) тунем пытарен. Паша корныжо Озаҥ оласе консерваторий денак кылдалтын: 1956 ий гыч – туныктышо, 1970-91 ийлаште – композиций кафедрын вуйлатышыже, 1977 ий гыч – профессор. 1969-73 ийлаште Йошкар-Оласе сылнысем училищыште композиций классым вӱден. МАССР композитор-влакын ушем правленийым вуйлатен (1965-76). Марий балет сымыктышлан негызым пыштен: икымшыже «Лесная легенда» лийын (1972). МАССР, РСФСР, Татарстан Республик сымыктышын сулло деятельже (1968, 1974, 1993). МАССР Кугыжаныш премий дене палемдалтын (1973). 2016 ийын шарнымаш книгаже лектын.

85 ий дене Климентий Сиватеевым.

Сиватеев Климентий Прокопьевич. 1934 ий 15-ше июньышто Курыкмарий районысо Кугилӓнсолаште шочын. Тунемме корныжо: Ленинградысе артиллерий технический училище (1954), РВСН Ростовысо кӱшыл командно-инженерный училище (1963). Армий деч вара кугыжаныш службыш куснен. 1985 ий гыч — Минлегпромын, Госкомстатын пашаенже. 1992-98 ийлаште – Российысе Президент пелен Марий Эл Республикын Постоянный представительын алмаштышыже. 3-шо классан Марий Эл Республикын действительный кугыжаныш советникше. «Страницы памяти» (2006), «Моё путешествие из Петербурга в Москву» (2012) книга-влакын авторжо.

70 ий дене Николай Токтауловым.

Токтаулов Николай Васильевич.1949 ий 8-ше июньышто Шернур районысо Товарнуреш шочын. Тунемме корныжо: 1-ше номеран Республикысе музыкально-художественный школ-интернат (1965), Ярославысе сӱрет училище (1969), Суриков лӱмеш Москосо сӱрет институт (1975). Художественный фонд пеленысе Марий мастаркудын пашаеҥже лийын. 1991 ий гыч шке усталык пашажым шукта. Ятыр портрет, пейзаж, натюрмортын авторжо. Марий живописьыш у шӱлышым пуртен. МАССР ПВС Чапкагаз дене (1981), Олык Ипай лӱмеш Марий комсомол премий дене (1982), Марий Элысе Кугыжаныш премий дене (1995) палемдалтын. МАССР сымыктышын сулло пашаенже (1990).

70 ий дене Александр Сосновым.

Соснов Александр Яковлевич.1949 ий 15-ше июньышто Курыкмарий районысо Шапкилӓ ялеш шочын. Йошкар-Оласе сылнысем училищым (1970), Чуваш пединститутым (1979) тунем пытарен. Паша корныжо шочмо районысо Виловатово села дене кылдалтын. 1979 ий гыч йоча сылнысем школышто туныктен. Тиде жапыштак калык ансамбльын концертмейстерже лийын. 1987-2012 ийлаште кыдалаш школышто музыкым вӱден. Самодеятельный композитор семын палыме. МАССР да Россий тӱвыран сулло пашаеҥже (1986, 2001). Марий Элын Кугыжаныш премийже дене палемдалтын (2007).

70 ий дене Вячеслав Очетовым.

Очетов Вячеслав Васильевич. 1949 ий 30-шо июньышто Юлсер кундемысе Курыклӱвал Шайра ялеш шочын. Тунемме корныжо:1964-68 ийлаште Оршанке педучилищыште шинчымашым поген, 1978 ийын Йошкар-Оласе сылнысем училищыш заочно тунемаш пурен. 1969-71 ийлаште – армий радамыште. Паша корныжо Сотнур школышто тӱҥалын (1971). 1974-2006 ийлаште Шайра школышто йоча-влакым музыка деке шӱмаҥден, ятыр семым возкален.

70 ий дене Олег Ураковым.

Ураков Олег Дмитриевич.1949 ий 28-ше июньышто Параньга районысо Элпанур ялеш шочын. Озаҥ оласе ялозанлык институтым тунем пытарен (1972). Паша корныжо шочмо районысо «Маяк» колхозын тӱҥ зоотехникше гыч тӱҥалын (1977). Сай пашажым ужын, Шернур районысо «Кукнурский» совхозым вуйлаташ шогалтеныт. 1978 ий гыч Куженер районышто: тӱҥ зоотехник, 1980 ий гыч – «Родина» колхозын вуйлатышыже, 1991 ий гыч – ялозанлык райуправленийын начальникше, 1996 ийын – районысо Администрацийым вуйлатен (кок тылзе), 1997 ий гыч – уэш «Родина» колхозын председательже. Марий Эл Республикын Чапкагазше дене палемденыт (1998). Марий Элысе ялозанлыкын сулло пашаеҥже (1999).

65 ий дене Валерий Ахметзяновым.

Ахметзянов Валерий Минлигареевич.1954 ий 4-ше июньышто Татарстан Актаныш районысо Мари-Суксы ялеш шочын. Шочмо ялысе школышто 23 ий завучлан тыршен (1987-2010). Актаныш районысо мервуй (1990-2008). Мер Каҥашын еҥже (2004-08). Марий калыкын погынжо-влакын делегатше (1996, 2000, 2004, 2008). «В память 1000-летия Казани» (2005), «Калык верч тыршымаш. Служение народу. Йыван Кырла. 1909-2009» медаль-влак дене, Марий Эл Правительствын Чапкагазше дене (2009) палемдалтын.

65 ий дене Николай Богдановым.

Богданов Николай Иванович. 1954 ий 13-шо июньышто Шернур районысо Лажъялеш шочын. Тунемме корныжо: Палантай лӱмеш сылнысем училище (1974), Озаҥ оласе тӱвыра институт (1978), Ленинградысе тӱвыра институтышто ассистентура (1985). Паша корныжо: Озаҥысе тӱвыра институтын туныктышыжо (1978-96), 1993 ий гыч Озаҥысе филармоний пелен «Весёлые Волгари» ансамбльын сылнешке вуйлатышыже. Татарстан Республикысе (1996) да Российысе (2015) тӱвыран сулло пашаеҥже. «В память 1000-летия Казани» медаль дене палемдалтын (2005).

65 ий дене Зинаида Артюшкинам.

Артюшкина Зинаида Сергеевна. 1954 ий 26-шо июньышто Курыкмарий районысо Микрӓк селаште шочын. Марий кугыжаныш педагогика институтым тунем пытарен (1975). Паша корныжо: 1-ше номеран школ-интернатыште йоча-шамычым кӱсле дене шокташ туныктен, Савинысе йоча пӧртыштӧ воспитательлан тыршен, Йошкар-Оласе 28-ше школышто туныктен. 1992 ий гыч Марий образований институтышто: национально-региональный образований пӧлкан методистше, марий калыкын историйже да тӱвыраже дене специалист. 1999 ий гыч «Марий туныктышо» мер организацийын вуйлатышыже. Марий калыкын 9-ше погынышто эскерыше (наблюдатель) лийын (2012).

65 ий дене Вячеслав (Славик) Асмаевым.

Асмаев Вячеслав (Славик) Михайлович. 1954 ий 29-ше июньышто Пошкырт кундем Бирск районысо Бахтыбаево ялеш шочын. Тунемме корныжо: Пошкырт кундемысе культпросветучилище (1973), Российысе театральный искусство академий (1995). 1975 ий гыч Йошкар-Олаште: артист, 1995 ий гыч балетмейстер, 2002-04 да 2014 ий гыч «Марий Эл» кугыжаныш куштышо ансамбльын сылнешке вуйлатышыже. Тыгак Марий тӱвыра да сымыктыш колледж пеленысе «Рвезылык» ансамбльын сылнешке вуйлатышыже. 2000 ий гыч Марий кугыжаныш университетыште туныкта. Туштак «Цармис» куштышо ансамбльым чумырен. МАССР да Российын сулло артистше (1980, 1995). МАССР-н калык артистше (1988). Олык Ипай лӱмеш кугыжаныш самырык-влакын премийже дене (1998), «За заслуги перед Марий Эл» орденын медальже (2009) да 2-шо степенян орден (2014) дене палемдалтын.

65 ий дене Зинаида Гордеевам.

Гордеева Зинаида Семёновна.1954 ий 30-шо июньышто Параньга районысо Ермучаш ялеш шочын. Пошкырт кундемысе мединститутым тунем пытарен (1979). Паша корныжо Йошкар-Оласе йоча горбольнице дене кылдалтын: эмлызе, 1982 ий гыч соматический отделенийын вуйлатышыже, 1988 ий гыч онкогематологический отделенийын вуйлатышыже, 2009 ий гыч тӱҥ врачын алмаштышыже. 1985-87 ийлаште Ленинградысе педиатрический мединститутын клинический ординатурыштыжо. Марий Элын да Российын сулло врачше (2002, 2010).

60 ий дене Михаил Васютиным.

Васютин Михаил Зиновьевич. 1959 ий 16-шо июньышто Курыкмарий районысо Микрӓк селаште шочын. Тунемме корныжо: Озаҥысе тӱвыра институт (1981), Российысе сымыктыш, тӱвыра да туризм сферысе пашаеҥ-влакым уэш ямдылыше (переподготовка) академий (1994). Паша корныжо МАССР тӱвыра министерстве дене кылдалтын: пӧлка вуйлатыше, Республикысе калык усталык рӱдер вуйлатышын алмаштышыже, варажым рӱдерым вуйлатен. 1990 ий гыч Йошкар-Оласе Администрацийыште тӱвыра пӧлкам вуйлатен. 1997-2017 ийлаште тӱвыра министр. Тӱҥ сомыл дене пырля 2002 ий гыч Марий Эл Вуйлатышын алмаштышыже, 2016 ий гыч Марий Эл Вуйлатышын икымше алмаштышыже. 2004 ий гыч Марий Мер Каҥашын еҥже (ныл созыв). 2005 ий гыч Российысе финн-угор калык-влак ассоциаций вуйлатышын алмаштышыже (кум созыв). 2008 ий гыч Тӱнямбалсе финн-угор калык-влакын консультативный комитетын еҥже (кум созыв). Марий Элысе да Российысе тӱвыран сулло пашаеҥже (1994, 2005). 2-шо да 1-ше степенян «За заслуги перед Марий Эл» орденла дене палемдалтын (2007, 2017).

60 ий дене Алевтина Сибаторкинам.

Сибаторкина (Горбунова) Алевтина Сергеевна.1959 ий 17-ше июньышто Курыкмарий районысо Ленин выселкыште шочын. Угарман кундемысе Щебекинский ПТУ-м тунем пытарен (1978). Паша корныжо шочмо районысо Мосолов лӱмеш племзавод-колхозышто тӱҥалын: 1980 ий гыч – животновод, 1985 ий гыч – машина дене лӱштышо оператор. 2009 ийын моло дене таҥастарымаште ик ушкал деч лӱштен налмаште шӧр лектыш республикыштына кӱкшӱ показательым ончыктен. МАССР-н эн сай вольык ончышыжо / животновод (1985). ВДНХ-н ший медальже дене палемдалтын (1988). Марий Элысе да Российысе ялозанлыкын сулло пашаеҥже (2000, 2012).

60 ий дене Надежда Бердинскаям.

Бердинская Надежда Алексеевна. 1959 ий 28-ше июньышто Шернур районысо Поланур ялеш шочын. 1976 ийын Шернурысо кыдалаш школым тунем пытарымеке, районысо газет редакций-влак дене пашажым кылден. 41 ий жапыште «Призыв», «Край сернурский» да «Шернур вел» газетлаште подчитчик гыч тӱҥ редактор марте кушкын. Российысе журналист-влак ушемын еҥже (2004 ий гыч). Марий калыкын погынжо-влакын делегатше (2000, 2004, 2008). Марий Элысе тӱвыран сулло пашаеҥже (2010).

55 ий дене Лидия Веткинам.

Веткина Лидия Васильевна. 1964 ий 24-ше июньышто Шернур районысо Тамшэҥер ялеш шочын. Йошкар-Оласе медучилищым тунем пытарен (1984). Паша корныжо Шернурышто тӱҥалын: 1984 ий гыч – льнозаводысо медпункышто медшӱжар, 1986 ий гыч – райбольницын терапий отделенийын медшӱжарже, 2011-16 ийлаште – районысо тӱвыра пӧртын методистше. Тӱрызӧ семын палыме. 1993 ий гыч тошто марий тӱрым шымла. «Душа России» правительствын премийже дене, Марий Элысе кугыжаныш премий дене палемдалтын (2011, коктыжат). Марий калыкын 9-ше погынын делегатше (2012).

50 ий дене Светлана Носовам.

Носова Светлана Николаевна. 1969 ий 21-ше июньышто Куженер районысо Эҥерӱмбал ялеш шочын. Тунемме корныжо: Республикысе культпросветучилище (1989), Марий кугыжаныш университет (1995). Паша корныжо Куженерысе кыдалаш школышто тӱҥалын, кугурак пионервожатый лийын. Варажым Верх-Ушутысо тӱвыра пӧртыштӧ сылнешке вуйлатышылан тыршен. 1995 ий гыч «Марий Эл» газетын пашаеҥже. Тӱрлӧ ийлаште тӱрлӧ йодыш дене редактор сомылым шуктен. 2008 ий гыч – историй да краеведений дене редактор. Российысе журналист-влак ушемын еҥже (1998 ий гыч). Сорос фондын журналист-влак коклаште эртарыме конкурсын лауреатше (1999). Марий Элын сулло журналистше (2016).