2016 ий 4 июньышто Киров кундем Пижан район Марий Ошай ялыште «Пеледыш пайрем» лиеш. Тиде кечынак Одо кундем Алнаш район Охотничий ялыште Семыкым палемдат. Нине пайрем дене Марий Оньыжа Эдуард Васильевич Александров саламла:

— Пагалыме марий калык!

Одо, Киров кундемлаште илыше марий-влакым да таче тушко толшо уна-шамычым Семык да Пеледыш пайрем дене саламлем.

Семыкат, Пеледыш пайремат марий калыкын илышыштыже кугу верым налыт. Шке йырышт шуко еҥым чумырат, марий йылмынам, тӱвыранам да йӱланам аралаш полшат. Тыгодым чыла тиде калык поянлыкым самырыктукым коклашке шараш йӧным ышта, нунымат кугезе йӱлам пагален илаш тарата.

Пайремда веселан да пайдалын эртыже. Марий сем, муро да куштымаш кумылдам вӱчкышт. Эрласе кечым порын вашлияш эреак ӱшан пеҥгыде лийже. Ош Кугу Юмо ончылно пелештыме поро мутда кажнын шӱмыш шыҥыже, умбакыжат калык семын келшен илаш полшыжо.

Пиалан, таза лийза! Марий чондам аралыза!

Пайрем дене!