2016 ийыште Марий самырыктукымын Россий кӱкшытан VIII слётшо 7-11 августышто Марий Эл Республик Оршанке район Кугу Ӧрша школ пелен эрта.

Ты гана Слётын темыже марий калыкын икымше Погынжым эртарымылан 100 ияш лӱмгече дене кылдалтеш. Тидын йыр мутланымаш, вашлиймаш, лекций, тренинг-влак лийыт. Проект пашалан посна тӱткышым ойырена, поснак самырык мер толкыным вияҥдыме шотышто. Угыч шке проектна-влакым возаш да аралаш тӱҥалына.

Тӱвыра программе Российысе кино идалыклан пӧлеклалтеш. Тыгак спорт модмаш, кидмастар клуб-влак пашам ышташ тӱҥалыт. Оршанке кундем дене лишкырак палыме лийына. Палемдыман, тыште кумдан палыме еҥ-влак писатель Яков Майоров-Шкетан, режиссёр, актёр Александр Янаев, Евгений ден Арсий Волковмыт (композитор ден поэт), артист Римма Руссина, писатель Феликс Майоров, калык туныктышо Пётр Емельянов да молат шочын-кушкыныт.

Тӱрыс слётын девизше: «Пушеҥгын вийже – вожышто, калыкын – у тукымышто».

Тӱҥ организатор-влак: Тӱвыра, печать да калык-влакын пашашт шотышто министерстве, Туныктыш да шанче министерстве, Мер Каҥаш, «Интеллектуал» тӱвыра-увер рӱдер, Оршанке район администраций, Кугу ӧрша школ.

А Слётыш логалаш манын, анкетым возен колташ кÿлеш. Тыгак анкете пелен шочмо вер-шӧр (оҥай вер, достопримечательность) нерген презентаций лийшаш. Тиде презентацийыште шке районын, олан, ялын моторлыкшым почын пуыман. Але вес тӱрлӧ презентацийым ышташ лиеш: шкендан кундемлан келыше марий йӱлам, тӱвырам почын ончыктыман. Тендан пашам ончен, турист-влакын ты кундемыш толаш кумылышт лекшаш.

Презентацийым PowerPoint программыште (10 слайд деч шуко огыл) ыштыман, видеомат пеленже пышташ лиеш. Тыгодым вуймутлан кугу тӱткышым ойырыза. Тудат сымыстарыше, оҥай, презентацийлан келшыше лийшаш. Шке пашадам Слётышто аралаш ямдылалтса!

Анкете ден презентацийым 2016 ий 11 июль марте marislet@mail.ru электрон почтыш колтыман. Анкетын образецшым www.mari-arslan.ru да www.mer-kanash.ru сайтлаште муаш лиеш.

Йодышда уло – йыҥгыртыза, возыза. Телефон: 8-917-703-66-24 але 8-917-705-50-60. Вконтактыште группо: vk.com/viiimarislet.

Оргкомитет.