Шергакан марий калык!

Марий Мер Каҥаш лӱм дене тӱрлӧ кундемлаште илыше марий калыкын ик эн йöратыме да ойыртемалтше Семык пайремже дене саламлем!

Калыкна ожнысек Семыкым жаплен да вучен. Ондак южо верлаште тиде кечын кумалтышым эртареныт. Семык эрдене мончаш пурен, ош тÿням коден кайыше-влаклан сортам чÿктен, ешлан, калыклан перкелыкым, шулыкым йодыныт. Кызыт тиде пайрем изиш вестÿрлемын гынат, южо йÿлаже садак аралалт кодын. Ындыжым тудым ятыр кундемлаште тÿшкан палемдаш тыршат да кугу пайремыштлан шотлат.

Семык – марий калыклан икте-весе дене келшен илаш йӧным, вийым да жапым пуышо пайрем. Марий калыкна эше ожнак кугу пайремым эртарымыж годым «Ушнымаште – вий!» куанле ойым ик йӱк дене ойлен да чыла кӧргӧ вийжым, тыршымашыжым иктышке ушен. Тыге каласаш лиеш кӱчыкын Марий Мер Каҥашын тачысе кӧргӧ шонымашыж нергенат.

Таче мый Тендам, мер да моло тӱрлӧ пашаште тыршыше-влакым, ӱшанен пуымо сомылым кӱлеш семын шукташ, марий йылмынан яндарлыкшым умылаш да икшыв-влакымат марла кутыраш, марла книгам, газетым лудаш, тӱвыранам, сымыктышнам да моло поянлыкнамат калык-влак коклаште ӱшанлын ончыкташ ӱжам. Лач тыге пашана воранен толеш да марий лӱмна тораше волгалтеш. Пеледыш кумылым, сылне илышым да ончыкылыклан сай ӱшаным тыланем. Таза лийза!

Семык пайрем дене!

Марий Оньыжа Александров Эдуард Васильевич.