ӰДЫРАМАШ ПОГЫНЫМАШ

Эн чолгаже, эн моторжо

 

Ӱдырамаш-влакын тӱнямбал кечышт вашеш, 6 мартыште, Э. Сапаев лӱмеш опере да балет театрыште Марий Эл Республикысе пашаче (деловой) ўдырамаш-влакын 2-шо форумышт эртен. (икымше тыгай форум 2016 ий 2 декабрьыште  лийын). Тушко Йошкар-Оласе ӱдырамаш-предприниматель-влак гына погыненыт манме йоҥылыш лиеш, шонем, социал пашаште тыршыше: врач, актрисе, туныктышо, муниципал пашаеҥ, нунын коклаште пенсийыште каныше-влакат ятырын улыт ыле – театрын мотор полат залыштыже чылаже 300 утла ӱдырамаш шинчен. Выставкылам ончен коштшыла да каныш жапыштат ятыр палыме марий ўдырамаш-влакын пырля чумырген мутланен шогымыштым  ужаш перныш. Марий Эл Республикысе пашаче ӱдырамаш-влакын ушемыштым вуйлатыше Оксана Татаринова форумым почмыж годым тыге каласыш: «Ме лӱмын пайрем деч ончыч погыненна: ваш-ваш саламлаш, ончыкылык пашанам рашемдаш, оласе да ялысе ӱдырамаш-влакым икте-весышт деке чакрак лишемдаш. Весат пеш куандара: форум Марий Эл правительствын да тудын вуйлатышыже Александр Евстифеевын сайлан шотлымыж почеш эрта. Тӱшкан ыштыме пашаланна точкым огыл, а шукыточкым шындыман». Мучаште «Ятыр ӱдырамаш тиде форумлан мотор платьым налын чиен» манме ойжо шыргыжалаш таратыш гынат, сылне деч сылне ӱдырамаш-влак ӱмбак ончалмек, пӱртӱсым ылыжтарыше, вӱрым модыктышо шошо толмо шижалте. Марий вургемым чийышат кумыт-визытше койо.

Марий Эл вуйлатыше Александр Евстифеев форум тӱҥалме деч ончыч кокымшо пачашыште чумырымо «Ӱдырамаш ыштен – чон дене ыштен» ончерым (модыш, шун гыч арвер, сӧрастарыме ӱзгар, книга да т. м.) ончен савырныш. Сценышке лектын, саламлыме мутым ойлыш:

— Женщины Марий Эл занимают активную жизненную позицию. Я, как Глава региона, благодарен им. Это мировая тенденция. Сегодня женщины – директора предприятий, школ, главные врачи. Если взять сферу малого предпринимательства, у республики большие надежды на то, что в ней бизнес с участием, под патронажем, учредительстве, руководстве женщин будет обязательно расти, — каласыш тудо. Шкенжын выступленийжым пытарыме деч ончыч «Форум женщин Марий Эл» книга дене палдарыш. Куд ӱдырамаш: РСФСР-ын сулло артисткыже-влак Алла Александрова да Галина Иванова, Марий Элын калык артисткыже-влак Елизавета Коновалова да Светлана Сушкина, Российын сулло артисткыже Маргарита Медикова, РФ-ын сулло спортмастерже Римма Пальцева – тудын кидше гыч типографий чия дене ӱпшалтше у книгам нальыч.

Форумын икымше ужашыштыже Марий Эл вуйлатышын алмаштышыже Илга Дравниеце республикыштына еш шотышто кугыжаныш политикым шыҥдарыме нерген каласкалыш. Промышленность, экономике вияҥмаш да торговльо министр Дмитрий Пугачёв экономикым нӧлтымаште ӱдырамаш-влакын рольышт нерген ойлыш да ӱдырамаш-влакым шушаш пайремышт дене саламлыш. Форумын кокымшо, кумшо да нылымше ужашыштыже нунак модератор лийыч, эше Тӱвыра, печать да калык-влакын пашашт шотышто министр Константин Иванов ушныш.

Кечывал деч вара ӱдырамаш предпринимательстве, мер организаций-влак дене кылым ыштыме, туризм, социал среда да шуко моло нергенат оҥай мутланымаш, каҥашымаш лийыч. Трибун дек лектын ойлышо кажне ӱдырамаш бизнес пашаштыже шумо кӱкшыт, вашлиялтше нелылык, бизнес-идейышт дене палдарышт. Тыге Марий Элысе ӱдырамаш-влак илышын чыла шӧрыныштыжат чолга улмыштым эше ик гана пеҥгыдемден ончыктышт.

Форум жапыштак «Идалыкысе ӱдырамаш-директор» российысе конкурсын регионал этапше иктешлалте. Сеҥышыш Йошкар-Ола гыч «Добрый путь» фирме вуйлатыше Ирина Бирюкова лекте.

Лидия Семёнова.

 

ДЕЛОВЫЕ, УСПЕШНЫЕ, КРАСИВЫЕ

6 марта, в канун Международного женского дня, в Марийском государственном театре оперы и балета имени Эрика Сапаева собрался 2-й республиканский форум деловых женщин по теме «Женский взгляд на развитие и благополучие Республики Марий Эл» (аналогичный форум состоялся 2 декабря 2016 года.) Свыше трёх сотен красивых и успешных женщин — предприниматели, врачи, учителя, деятели искусств, муниципальные  и государственные работницы – заполнили зал театра. Их поздравил Глава республики Александр Евстифеев. Он также презентовал книгу «Форум женщин Марий Эл», куда вошли биографии 40 славных землячек. Работа форума шла на нескольких площадках, действовала выставка с символическим названием «Сделано женщиной – сделано с душой». Модераторами обсуждений стали заместитель Председателя правительства Марий Эл Илга Дравниеце, министр промышленности, экономического развития и торговли Дмитрий Пугачёв, министр культуры, печати и по делам национальностей Константин Иванов. Состоялся конкурс «Женщина – директор года» с участием четырёх представителей прекрасного пола. Победителем стала руководитель фирмы «В добрый путь» (Йошкар-Ола) Ирина Бирюкова.