24 июньышто Провой кундем Кужмара школышто Звенигово районысо марий самырык тукымын икымше форумжо эртаралтын. Тудым «Провой» манын лӱмдымӧ.  Тышке кажне ял шотан илем гыч 14-30 ияш ныл марий еҥ дене ӱжыныт.

Форумым Звенигово район администраций, тысе Национальность паша шотышто  ден Пашам ыштыше молодёжьын советышт, тӱвыра, образований пӧлка-влак, Кужмарий школ, Мер Каҥаш, Звенигово районысо самырык-влакын парламентышт эртареныт. Ты мероприятийым районысо тӱвыра пӧлкам вуйлатыше, Мер Каҥашын еҥже Михайлова Лидия Аркадьевна тарватен да тудым эртарымаште тыршен. Тидлан делегат-влак деч 100 теҥге дене надырым погеныт, тыгак спонсор-влаклан эҥертеныт. Тиддене участник-шамычлан блокнот ден ручкам налыныт, форумын эмблемыжым ыштеныт да молодёжьын гимнжым кажныжлан возен пуэныт.

Форумым Звенигово районым вуйлатыше Козлова Наталья Николаевна, районысо администрацийым вуйлатыше Геронтьев Владимир Евгеньевич, Кужмарий ял шотан илемым вуйлатыше Васильев Вячеслав Николаевич  торжественно почыныт.

Тылеч вара кажне команде шке ял шотан илемже нерген оҥайын каласкален, вес семынже тудым «Визитке» маныт. Эн оҥайын Какшамарий гыч  толшо ӱдыр-рвезе-влак каласкаленыт. Нуно марий вургемым чиен лектыныт да Какшамарий нерген такмакым, мурым муреныт, куштеныт, а тыгодым ялышт нерген видеовойзыш ончыкталтын.

А вара делегат-влак кок командылан шелалтыныт. Команде-влаклан пырля кузе пашам ыштыме нерген участник-влаклан тренингым Йошкар-Ола гыч мийыше почётан уна Садовин Игорь Геннадьевич эртарен. Тылеч вара чыланат площадкылашке каеныт. Форумышто самырык-влак ныл тӱрлӧ корно дене пашам шуктеныт: «Эко-культур», «Таза илыш-йӱла», «Молодёжь самоуправлений» да «Марий калыкын тӱвыраже да йӱлаже». Тыгак форумын участникше-влак тӱрлӧ мурымо-куштымо, мыскарам ыштыме номер-влакым ямдылен конденыт да ончыктеныт. А форумым сӧрастараш Кужмарасе йоча сымыктыш школын тунемшыже-влак, кӱслезе-влакын коллективышт да «Юлавий» ансамбль полшеныт.

Поянсола тӱвыра пӧртым вуйлатыше Щербаков Александр Николаевич «Таза илыш-йӱла» теме дене тренингым эртарен, медитаций кузе ышталтме нерген каласкален. Ӱдыр-влак сӧрастарыме ӱзгарым ышташ, тӱрлаш да моло пашаланат Звенигово районысо краеведений тоштерын да Звениговысо калык кидмастар пӧртын пашаеҥышт туныктеныт. «Эко-культур» площадкыште Марий кундемыште илыше янлыкын, кушшо кушкылын да молынат марий лӱмыштым пален налыныт, экологий дене кылдалтше йодыш-влаклан вашмутым кычалыныт. «Марий калыкын тӱвыраже да йӱлаже» площадкыште марий семӱзгарлан шӱмаҥденыт, гармонь, тӱмыр да шиялтыш дене шокташ туныктеныт. Тыгак  Йошкар-Олаште эртыше регион-влак кокласе Пеледыш пайрем годым эртаралтше «Марий ӱдыр — чолга шӱдыр» конкурсышто сеҥышыш лекше Анжела Филиппова ӱдыр-рвезе-влакым марла кушташ туныктен.

Тыгай форум-влак марий самырык тукым дене ончыкыжым могай пашам виктараш кӱлмӧ нерген пален налаш, ӱдыр-рвезе-влакын социально кӱлешан пашаштым виктарымашке моло чолга еҥ-влакымат пырля ушаш да районышто марий молодёжьын актившым чумыраш полшат.

Икымше марий форум лектышан лийын. Форум мучаште резолюцийым луктыныт. Тушто ик эн кӱлешан ужашыжлан самырык-влакын ушемыштым ыштымым шотлыман. А эн чолга участник-влаклан Мер Каҥашын еҥже, оналмаш Эштуков Игорь Викторович Марий самырык тукымын IX-ше слётышкыжо да «Кравец» тӱвыра да шинчымаш форумышко ӱжмашым кучыктен. А вара «Ме  марий улына» гимным пырля муреныт. Ынде тыгай форумым Провой кундемыште кажне ийын эртараш кутырен келшеныт.