Марий самрык тукымын черетан Х слётшо тений 2-8 июльышто Шернур район Марисолаште лиеш.

Слётын ик шонымашыже – тӱрлӧ кундемыште илыше самырык ӱдыр-рвезе-влаклан марий калыкын илыме мландыштым ончыкташ. Ты кугу мероприятий тӱрлӧ кундемлаште илыше, тунемше да пашам ыштыше самырык еҥ-влакым 2008 ий годсек иквереш чумыра. Слётышто марий ӱдыр-рвезе-влак жапым веселан гына огыл, пайдалын эртарат. Тушто тӱрлӧ проектым возат, вара илышыш шыҥдарат. Мутлан, марий-влакын тӱшкан илыме верлаште «Айста, марла кушталтена» флешмобым, Морко кундемыште «Унчо-fest» лагерь-семинарым эртараш шонымаш-влак лач слёт годым шочыныт.

Ӱмаште, 4-10 июльышто Килемар район Арда селаште IX-ше слётшо эртаралтын. Тыгодым тӱҥ шотышто ялыште туризмым вияҥдыме, самырык-влаклан паша верым мумо дене кылдалтше йодыш-влакым каҥашыме.

Кодшо ийысе слётышто самырык тукым шочмо мландым уэмдаш, вияҥдаш да шочмо верлан у шӱлышым пуртымо шотышто шонкалаш, тӱрлӧ пашам темлаш таратен. А варажым илыме верыштыже нине паша-влакым илышыш шыҥдараш кумылаҥдышаш ыле.

Слётышко 70 наре еҥ участник лийын. Нуно Пермь, Свердловск, Киров областьла гыч, Ханты-Манси автономный округ, Пошкырт кундемысе Янаул, Калтаса да Мишкан районла гыч толыныт. Участник-влакым ныл лужалан пайлыме. Лужа-влакым чолга ӱдыр-влак — Татьяна Япаева, Алина Макарова, Надежда Ильина, Эльза Александрова — вуйлатеныт. Кажне еҥ могай корно дене пашам ышташ тӱҥалеш ойырен налын да тудо теме проектшым арален.

 

Марий самырык тукымын слётшо-влак эртеныт:

I слёт – Морко район Октябрьскийыште

II слёт – Советский район Ӱшнурышто

III слёт – Курыкмарий район Эманыште

IV слёт – У Торъял район Токтарсолаште

V слёт — Волжский район Пӧтъялыште

VI слёт – Параньга район Олорышто

VII слёт – Провой кундем Чакмарийыште

VIII слёт — Оршанке район Кугу Ӧршаште

IX слёт – Килемар район Ардыште

X слёт Шернур район Марисола кундемыште лиеш!