1. Слётышто могай сомыл-влакым шуктыман?

а) марий чоным чӱкташ, чыгылташ, кушташ;

б) он (лидер)-влакым шочыкташ, палемдаш, кушташ;

в) палыдыме, у шинчымашым пуаш.

2. Кушан погынаш?

Оралте + пӱртӱс. Эн келшен толшо вер – школ. Тушто кочкаш, малаш, занятий-влакым эртараш вер уло. Тӱшка погынлан зал уло.

3. Слётыш кӧм чумыраш?

18-30 ияш-влакым. Тиде жапыште самырык еҥ сурт гыч лектын кая — тунемаш, пашам ышташ, пиалым кычалаш; ешым погаш эн келшыше пагыт. Южгунам 16 ияш чолга еҥымат пурташ лиеш.

4. Могай йылме дене эртараш?

Марий йылме дене. Марий йылме ОЗА лийшаш. Кӧ марла ок мошто, тудым вурсаш огыл, а сымыстарен туныкташ (ава семын, пушкыдын). Ала-могай йодыш дене специалистым ӱжмо гын, тек рушла ойла. Вет:

а) рушла чыланат умылена,

б) спецлан ойлаш куштылшо,

в) термин-влакым кусараш огеш кӱл (таче тиде нелылык).

5. Слётын учредительже кӧ лишаш?

Мер организаций да район администраций. Коктын гына. Админын ресурс кугурак:

а) оргйӧн – спец-влакым колтен кертеш,

б) окса – бюджет гыч але спонсор гоч ойыра,

в) админ айдеме – кӧм кӱлеш «сымыстара».

6. Оргкомитетыш кӧм пурташ?

а) самырык чолга еҥ-влак – тек моштымыштым ончыктат,

 б) спец-влак – тек туныктат,

в) админ-влак – тек полшат,

г) Мер Каҥашын еҥ-влак – тек палат да полшат (Мер Каҥаш Россий кӱкшытан слётым 2009 ийыште тӱҥалын, садлан кугурак улеш).

7. Окса лекше «памаш-влак»:

а) грант – таче эн йӧнан корно,

б) спонсор – кушто посна окса кӱлеш,

в) район бюджет – кунам Оньыжа, министр да моло тӧра толыт, нуным слёт окса дене йӱкташ-пукшаш ок лий, район глава ушнышаш. Кушеч тудо оксам луктеш – тудо шке пала.

8. Программыште мо лийшаш?

Эн шерге йодыш. Вич раздел лийшаш:

а) йылме – марла вӱдаш, ойлыкташ, мурыкташ, куштыкташ да воштылташ,

б) тӱвыра – мастаркудо-влак лийшаш улыт – ала-молан туныкташ,

в) эртык – калык историй нерген лекций лийшаш, самырык еҥын калык верч кугешнымаш шочеш,

г) йӱла – марий кумалтышыш пуртен-лукташ, уке гын – онаеҥ дене вашлийаш,

д) проект пашалан туныктымаш.

Ик-кок кечыште 5 разделым авалтен огыда керт гын (спец-влакым муын огыдал, жап шыгыр да т.м.), тугеже кум раздел марте иземдаш лиеш. Кумыт деч шагал – тиде шагал!

9. Слётым кунам эртараш?

а) эн сай кеҥежым: мотор пӱртус, сай игече, самырык-влакын каникул але отпуск,

б) теле каникул годым лиеш,

в) каныш кече жапыште (шумат-рушарнян) лиеш.

10. Слёт нерген кӧ палшаш?

Калык. Садлан, слётыш журналистым ӱжман. Руш тӧран ойжо уло: «Провести мероприятие – полдела, отчитаться о нём – это дело!» А тылат, марий организатор, молан шке сеҥымаш нерген моктанаш огыл? Тек тиде сомылым журналист шукта. Тиде тудын киндыже.

Марий Мер Каҥаш вуйверыште 2019 ий 28 пургыж кечын тидым пунчалме. Марий Эл, Советский оласе шотан илем. Оналмаш В.А. Мочаев йоҥгалтарен.