2017 ий сӱрет тылзын 5-ше кечыже шинчымашым погымо кече ыле.

Эн ончычак «слётчик-влак» Садовин Игорь Геннадьевичын эртарыме «Брендинг территории» лекцийышкыже чумыргеныт. Ӱдыр-рвезе-влак шке илыме верыштын паспортыштым ямдыленыт: ял лӱмым ончыктеныт, тудо мом ончыктымыжым умылтареныт, мыняр пӧрт, библиотек, школ улмым, могай ийготан калык рашемденыт, вер-шӧр ойыртемже нерген возеныт, тукымышто кӧ дене кугешнымыштым, мом ялыште уэмдаш кӱлмым пален налыныт. Икманаш, пайдале лекций ыле.

Кокымшо паша самырык тукымлан ончыкылык илышыштыже эшеат кугурак пайдам кондышаш. Ӱдыр-рвезе-влаклан «Вийар» ушемым вуйлатыше Иванова Елена Александровна проектым возымо радамым каласкален: мо гыч тудо шога, кузе тудым илышыш шыҥдарыман. Тыгак организатор-влак могай проектым ыштыме да кузе илышыште тудым организоватлыме денат палдареныт.

Тунемме деч посна самырык-влак шке шинчымашыштым квест модыш гоч тергеныт. Нуно куд станцийыште тӱрлӧ йодышлан вашмутым кычалыныт.

А вара «Калык кидпаша» мастарлык школ шке пашажым ыштен. Тыште «Вӱдвоштыр сем», «Курчакым ыштымаш», «Марий тӱр», «Марий ӱштӧ» мастар-класс-влак лийыныт. Кажне самырык еҥ шкаланже могай-гынат пӧлекым ыштен.

Кокымшо кече Марий кас дене пытен. Ӱдыр-рвезе-влак, сылне марий сем почеш рӱж-ж куштен, жапым веселан эртареныт. А нунылан гармоньым Параньга вел рвезе Игорь Смирнов шоктен.

Чылалан кугу тау!