Сӱрем але шырка тылзын 4-ше гыч 10-шо кечыж марте Килемар район Церкысола / Арда селаште Марий самырык тукымын IХ слётшо эрта.

Ты гана тудо «Шочмо кундем – кугезе мланде» темылан пӧлеклалтеш. Слётын девизше: «Пушенгын вийже — вожышто, калыкын — у тукымышто».

Индешымше слётышто этнотуризмым вияҥдыме, амалкалче паша, мер пашам шуктымо шотышто туныктат, этнокультур шотышто проект-влакым возымым умылтарат. Тыгак тӱрлӧ мастар-класслаште шке мастарлыкым ешараш йӧн пуалтеш. Самырык ӱдыр-рвезе-влак кидмастар-влакын мастерскойышкыжо логалыт, спорт таҥасымашке ушнат, экскурсий дене коштыт, тӱвыра да каныме мероприятийлаште чолгалыкыштым ончыктат.

Тыгак 8 июльышто Арда эҥер сер воктене луымшо гана эртаралтше «Кугезе мланде» фольклор ден этнографий пайремыште лийыт. Уна семын огыл, а марий калыкын илышыж гыч ик эн кугу событийым – Марий калыкын икымше погынжым — модын ончыкташ полшат. Тыгак ты пайремым волонтёр семын эртарымашке ушнат.

Слётышко марий-влакын илыме тӱрлӧ кундемла гыч 18-30 ияш ӱдыр-рвезе-влакым вучат. Кумылан-влаклан «Молодежь России» информационный системыште (https://ais.fadm.gov.ru/registration) регистрацийым эртыман да marislet2017@mail.ru электрон почтыш йодмашым 28 июнь марте возен колтыман.

А слётышто паша ушныжо манын, шочмо кундем нерген PowerPoint формат дене презентацийым ямдылен кондыман. Тушто 15 деч шуко слайд лийшаш огыл. Тыгак тиде вич минуташ видеоматериал лийын кертеш.

Марий самырык тукымын IХ слётышкыжо Марий Эл, Пошкырт, Татарстан, Удмуртий Республикыла гыч, Киров, Угарман, Пермь, Свердловск да моло вер гычат 70 еҥым вучат. Те самырык да чолга улыда, марла мутланеда да марий йӱлам акледа – толза тугеже Марий самырык тукымын IХ слётышкыжо! Вучена!