16-17 февральыште Совет районысо Ӱшнӱр кыдалаш школ поснак йӱк-ӱан дене темын. Вет ты школ верысе кундемыште икымше гана эртаралтше Марий самырыктукым слётын участникше-влаклан шке омсажым почын. Организатор-влакын (Ягодарова Ольга, Игнатьева Светлана да Виногоров Владимир) шонымышт почеш, тиде слётын тӱҥ сомылжо — марий улмым мондаш огыл, шочмо йылмым, тӱвырам арален кодаш да Россий кӱкшытышто эртаралтше самырыктукым слётыш чолга еҥым ямдылаш.

Слёт уна-влаклан поян лийын. Тиде Совет район вуйлатыше Трудинов А.А. да тудын алмаштышыже Пьянкова И.И., Ӱшнӱр ял кундем вуйлатыше Басов В.Н., тӱвыра, спорт, да туризм кучем вуйлатыше Чепайкина Т.Н., оньыжан икымше алмаштышыже, «Марий сандалык» журналын тӱҥ редакторжо Мочаев В.А. да Мер Каҥаш еҥ Эштуков И.В. Чылаже слёт 40 утла еҥым поген: туныктышо ден тунемше, студент да уна-влак. Паша программе келге, оҥай да пайдале лийын. Участник-влак кум лужалан шелалтыныт: «Марий шӱдыр-влак», «Ош висвис» да «Чинчышудо». Слётын икымше ужашыштыже марий калыкын историйже, тӱвыраже нерген (Л.Е.Васильева, краевед), марий йылме телевиденийыште (Н.Любимов, ВГТРК-ан журналистше) да проектым чын возаш туныктымо лекций-влакым колышташ йӧн лийын.

Кас кочкыш деч вара слётын участникше-влак оҥай модыш-влак дене модыныт, марий тӱрым тӱрленыт, аралтыш курчакым ыштылыныт, марла кушташ тунемыныт. Участник-влаклан яра шинчаш жап лийын огыл, паша радам йӱд марте каен.

Слётын участникше-влакын ойлымышт почеш, ты мероприятий пеш пайдале лийын. Вет нуно шуко оҥайым пален налыныт, келшымаш кылым кученыт да районысо уста, пагалыме еҥ-влак дене палыме лийыныт.
Светлана Игнатьева, Кужмарийысе школын марий да англичан йылмым туныктышо.

Игорь Малинин да Татьяна Чепайкинан фото-влак.