Марий самырыктукымын Россий кÿкшытан VIII слётшо койын лишемеш. Тиде пагытыште программе шотлан кондалтеш, лектор, тренер-влак дене кыл ышталтеш да моло йодышат рашемдалтеш. 11 июль марте Слётыш толаш кумылан-влакын йодмашышт чумыргат. Тугеже тыланетат, йолташ, нерен шинчаш жап уке! 18-30 ияш марий еҥ улат гын, анкете ден презентацийым ыштен колто веле! Анкетым http://mari-arslan.ru сайтыште налаш лиеш. А серышым marislet@mail.ru  электрон почтыш вучена.

Тений Марий самырыктукым слёт марий калыкын икымше Погынжым эртарымылан 100 ий темме лÿмеш пöлеклалтеш. Сандене Слётын темыжат лач тидын дене кылдалтеш. Тыге ÿдыр-рвезе-влакым «Марий мер толкынын вияҥме корныжо», «Калыкын поянлыкше», «Калык модыш: чумырымо да тунемме йодыш», «Финн-угор проект-влак: тачысе паша да эрласе ÿшан» лекций-мутланымаш-влак вучат. Ныл лужа ныл виктыш гоч эрта. Тиде – «Проект пашан тÿҥжö», «Оҥайын шонен моштымаш», «Пайремым ямдылымаште да эртарымаште тÿрлö йöн» да «Марий калыкын ойыртемже» тренинг ден практике паша.

А Слёт мучаште ныл лужа ныл проектым аралаш тÿҥалеш. Нине проектым идалык мучко илышыш шыҥдарышаш улына. Сандене грантым пуышо министерствыла гыч еҥ-влакым жюришке ÿжына.

Слётын тÿвыра программыже Российысе кино идалыклан пöлеклалтеш. Ты шотыштат оҥай вашлиймаш-влак лийыт. Тыгак Оршанке кундем дене лишкырак палыме лийына. «Сылнымут йолгорно», «Какшан эҥерын тÿҥалтышыже», «Историй дене кылдалтше памятник-влак» экскурсийлаште шуко пален налына.

Самырык-влаклан мастар класс-влак лийыт. Тÿрлаш, тасма дене мотор ÿзгарым, кагаз гыч тÿрлö сувенирым ышташ да воштыр дене пидаш тÿҥалыт.

Икманаш, 7-11 августышто Оршанке район Кугу Ӧрша школ пелен Марий самырыктукымын Россий кÿкшытан VIII слётшо гÿжлаш тÿҥалеш! Чынак вет, «Пушеҥгын вийже – вожышто, калыкын – самырык тукымышто».

Самырык пагыт – мемнан.
Самырык ме улына.
Ме кугешнен ойлена:
«Ме марий улына!».

Тӱҥ организатор-влак: Мер Каҥаш, «Интеллектуал» тӱвыра-увер рӱдер, Оршанке район администраций, Кугу ӧрша школ Марий Эл Республикысе Тӱвыра, печать да калык-влакын пашашт шотышто министерстве, Туныктыш да шанче министерстве, М.А. Кастрен Обществе  полшымо дене.

Автор: Эльвира Куклина.
Фотошто: Йошкар-Оласе да Оршанке районысо
пашаче группо-влак, оргкомитет Слётлан ямдылалтыт.