80 ий дене Нестор Ихонькиным.

Ихонькин Нестор Иванович. Курыкмарий район Сарапаево ялеш 1939 ий 16-шо мартыште шочын. Тунемме корныжо: Тимирязев лӱмеш ялозанлык академий (1961), Моско оласе ялозанлык йӧндартыш/производство инженер-влакын институт (1976). Паша корныжо Йошкар-Оласе совхоз-техникум / аграгий колледж дене кылдалтын: 1965 ий гыч туныктышо, варажым отделений вуйлатыше, партком секретарь, вуйлатышын алмашыже сомылым шуктен. МАССР школын сулло туныктышыжо (1983). Российын сулло туныктышыжо (2000).

70 ий дене Леонид Токаревым.

Токарев Леонид Юрьевич. Йошкар-Олаште 1949 ийын 1-ше мартыште шочын. Йошкар-Оласе сылнесем училищым заочно тунем пытарен (1972). Армийыште служитлыме годым «Радуга» ансамбльын участникше лийын (Йошкар-Ола, 1968-70). 1970 ий гыч «Мари» вокал да инструментал ансамбльын тӱмырзыжо / барабанщикше лийын. 1975-88 ийлаште Сеҥымашын 30-шо идалыкше лӱмеш тӱвыра полат пелен «Сувенир» ансамбльым чумырен да вуйлатен. Ты коллектив тӱрлӧ конкурслаште шке вийжым терген: Сочи олаште политмуро конкурсын лауреатше (1975), Тӱнямбалсе самырыктукым да студент-влакын фестивальын участникше (1979), Путынь Союзын любительский коллектив кокласе смотрын сеҥышыже (1980), Олык Ипай лӱмеш Марий комсомол премийын лауреатше (1980). ВДНХ-н шӧртньӧ да той медаль дене палемденыт (1980, 1981). Марий Элысе тӱвыран сулло пашаеҥже (2008).

70 ий дене Георгий Валитовым.

Валитов Георгий Николаевич. Пошкырт кундем Мишкан районысо Букленда ялеш 1949 ий 6-шо мартыште шочын. Тунемме корныжо: Благовещенск оласе педучилище (1968), Марий кугыжаныш пединститут (1974), Тарту оласе университет пеленысе аспирантура (1978). 1978 ий гыч Марий кугыжаныш университетыште пашам тӱҥалеш: кӱшыл преподаватель гыч кафедрым вуйлатыше марте кушкын. Филологий наука кандидат (1978). Марий Элысе образованийын сулло пашаеҥже (2004).

70 ий дене Александр Егошиным.

Егошин Александр Яковлевич. У Торъял районысо Савлич ялеш 1949 ий 9-ше мартыште шочын. Тунемме корныжо: Марий совхоз-техникум (1968), Озаҥысе ялозанлык институт (заочно, 1976). Паша корныжо: «Прогресс» колхозын председательже (1973 ий гыч), У Торъял районысо Администрацийын вуйлатышыже (1993-97, 2000-01). 2001-15 ийлаште ялозанлык да продовольствий министр да Марий Элысе Виктер вуйлатышын алмаштышыже сомылым шуктен. Ялозанлык шанче кандидат (1991). МАССР Верховный Советын депутатше (1990-93), Марий Элысе Кугыжаныш Погынын депутатше (1996-2001). «За трудовую доблесть» медаль (1975), Трудовое Красное Знамя (1979) да «Знак Почёта» (1986) орденла дене палемдалтын. МАССР-се Кугыжаныш премий дене палемденыт (1987). Марий Элысе да Российысе ялозанлыкын сулло пашаеҥже (1993, 2004). «За заслуги перед Марий Эл» 2-шо степенян орден дене (2007), Россий кӱкшытан «За труды по сельскому хозяйству» медаль дене (2013) палемдалтын.

70 ий дене Анатолий Муравьёвым.

Муравьёв Анатолий Васильевич. Морко районысо Куркумбал ялеш 1949 ий 11-ше мартыште шочын. Марий кугыжаныш пединститутым (1977), Моско оласе пединститутышто аспирантурым (1986) тунем пытарен. Паша корныжо Совет районысо кыдалаш школышто тӱҥалын – туныктышо, директор лийын. 1981 ий гыч – Марий кугыжаныш пединститутышто: сектор вуйлатыше, КПСС облкомын консультантше. 1992 ий гыч – Марий образований институтышто: ректор, варажым кафедрым вуйлатыше. 2009-14 ийлаште – Калыкле тоштер вуйлатыше. Историй шанче кандидат (1987). Марий Элысе образованийын сулло пашаеҥже (2008).

70 ий дене Владимир Мальцевым.

Мальцев Владимир Энгельсович. Одо кундем Увинск районысо Новый Мултан селаште 1949 ий 26-шо мартыште шочын. Моско оласе кугыжаныш университетым тунем пытарымеке (1972), направлений почеш Йошкар-Олаш толеш. Корреспондент, ответственный секретарь, редакторын алмашыже пашам шуктен. 1991-99 ийлаште «Марийская правда» газетын тӱҥ редакторжо. «Добрые соседи» политгазетын организатор да тӱҥ редакторжо (2000-05). Мыскара сынан ойлымаш-влакын, кочкыш йӧрвар нерген книга-влакын автор. Марий Элын сулло журналистше (1994).

65 ий дене Леонид Кубековым.

Кубеков Леонид Зиновьевич. Курыкмарий районысо Ӱлыл Солаволки ялеш 1954 ий 26-шо мартыште шочын. Чувашийысе ялозанлык институтым тунем пытарен (1976). 1979 ий гыч «Горномарийская» чывефабрикыште: тӱҥ инженер, вуйлатышын алмашыже. 2001-14 ийлаште Курыкмарий районысо Администрацийыште: вуйлатышын икымше алмашыже, вуйлатыше. Марий Элысе ялозанлыкын сулло пашаеҥже (1996). «За заслуги перед Марий Эл» орденын медальже дене палемдалтын (2010). 9-ше Марий калык погынын делегатше лийын (2012).

65 ий дене Валерий Кузьминыхым.

Кузьминых Валерий Владимирович. Совет районысо Чкарино селаште 1954 ий 26-шо мартыште шочын. Марий политехнический институтым тунем пытарен (1976). Йошкар-Оласе инструментальный заводышто, МарНИИЯЛИ-ште инженерлан тыршен. 1988 ий гыч «Молодой коммунист», «Республика», «Марийская правда» газет-влакын фотокоржо лийын. 2010-2018 ийлаште Марий Элысе Вуйлатышын Администрацийыште фотокорреспондент. Фотопортретлан мутпортретым мастарын почын моштымо дене ойыртемалтеш. «Монастыри Росиии» кум томым чумырышо-влак коклаште (Моско ола, 2003, 2004, 2007). «Марий Эл. Земля, на которой хочется жить» (2010), «Царёв город» (2012) фотоальбом-влакым чумырен. 1995, 2003, 2006 ийлаште Йошкар-Олаште фотоончерже лийыныт. Марий Элысе Президентын «Золотое перо» премий дене палемдалтын (2002). Марий Элын сулло журналистше (2004). «За заслуги перед Марий Эл» орденын медальже дене палемдалтын (2014).

65 ий дене Татьяна Золотовам.

Золотова Татьяна Аркадьевна. Йошкар-Олаште 1954 ий 30-шо мартыште шочын. Тунемме корныжо: Марий кугыжаныш пединститут (1975), Моско оласе кугыжаныш университетысе аспирантура (1983). Паша корныжо Марий кугыжаныш университет дене кылдалтын: туныктышо, доцент, профессор, 1989 ий гыч руш да йот элласе литература кафедрын вуйлатышыже. Руш тӱвыра дене кылдалтше монографий-влакын авторжо. Филологий шанче доктор (1998). Российысе вузласе фольклор комиссийын еҥже (1994). Марий Элысе шанчын сулло деятельже (2002).

60 ий дене Михаил Калиновым.

Калинов Михаил Алексеевич. Курыкмарий районысо Наумово ялеш 1959 ий 7-ше мартыште шочын. Марий политехнический институтым тунем пытарен (1981). Медведево районысо ВЛКСМ комитетын (1985-87), варажым обласной ВЛКСМ комитетын (1989-90) икымше секретарьже лийын. Совмин пеленысе самырыктукым, еш да демографий политике шотышто пӧлкам вуйлатен (1990-92). «Маримедсервис» страховой компанийым чумырен да вуйлатышыже лийын (1992-94). Финанс министрын икымше алмашыже (1996). Экономике да финанс йодыш-влак шотышто Виктер Вуйлатышын алмаштышыже (1997-98). Марий Элысе экономике да йӧнозанлык/промышленность министр (2001-02). 2002 ийын шке кумылын ты пашам коден.

60 ий дене Иван Ялтаевым.

Ялтаев Иван Фёдорович. Шернур районысо Ананур ялеш 1959 ий 11-ше мартыште шочын. Марий кугыжаныш университетым тунем пытарен (1983). Паша корныжо Марий Турек районышто тӱҥалын: Сысоевысо кыдалаш школышто туныктен (1983-84, 1987-95), Малинкинский сельсоветым вуйлатен (1984-87), Чапаев лӱмеш колхозышто партбюрон секретарьже лийын (1987-89). 1995 ий гыч Марий кугыжаныш университетыште: туныктышо, историй да филологий факультетын деканже (2006-13), отечественный историй кафедрын доцентше (2013-16). 2016 ий гыч Йошкар-Оласе аграрий колледжыште историйым туныкта. Историй шанче кандидат (1999). Российысе кӱшыл профессионал образованийын почётан пашаеҥже (2011).

60 ий дене Владимир Кашковым.

Кашков Владимир Геннадьевич. Юлсер районысо Челюскино ялеш 1959 ий 17-ше мартыште шочын. Марий кугыжаныш университетым тунем пытарен (1984). Паша корныжо шочмо районышто тӱҥалын. 1984-89 ийлаште Отымбал кыдалаш школышто туныктен, внеклассный паша шотышто организатор лийын. 1989 ий гыч Провой кундемыште. Ташнур школын туныктышыжо да вуйлатышыже (1989-2003). 2003 ий гыч – Красноярысе школышто туныкта да вуйлата. Краевед. Провой кундемысе Погынын депутатше (1996-2000). Марий калыкын 9-ше да 10-шо Погынын делегатше (2012, 2016). Российысе иктежле / общий образованийын почётан пашаеҥже (2000). Марий Элысе образованийын сулло пашаеҥже (2007).

60 ий дене Вадим Ананьевым.

Ананьев Вадим Петрович. Самара кундем Кинель-Черкасский районысо «Рабочий» зерносовхозышто 1959 ий 21 мартыште шочын. 1971 ий гыч Марий Элыште. Куженерысе, варажым Медведево районысо Кузнецово селасе школлаште тунемын. 1976-77 ийлаште Марий культпросветучилищыште шинчымашым поген. 1979 ийыште Медведево районысо Ежово селаште клубым вуйлатен. Уэш тунемаш тӱҥалеш: Озаҥ оласе тӱвыра институт (1983), Гнесинмыт лӱмеш кугыжаныш мурсем-педагогика институт (1989). 1983-84 ийлаште Йошкар-Олаште Музыкальный театрын солистше. 1987 ий гыч Александров лӱмеш муро да куштышо академический ансамбльын солистше. Тӱня мучко гастроль дене коштын. Пхеньяныште эртаралтше Тӱнямал фестивальын икымше премий дене палемдалтын (1998, 1999). Российын сулло да калык артистше (2000, 2005).

60 ий дене Тамара Андриановам.

Андрианова Тамара Викторовна. Морко районысо Ард-Солаште 1959 ийын 23-шо мартыште шочын. Марий кугыжаныш пединститутым заочно тунем пытарен (1992). 1979-89 ийлаште механический заводышто распределитель, спортинструктор лийын. Ятыр велопробег-влакын участницыже. 1990 ий гыч – бизнесъеҥ. 30 ий утла пеледыш ужалмаште тыршен. Мари-влаклан эреак полшен шоген (спонсор). Кызыт сулен налме канышыште.

60 ий дене Александр Принцевым.

Принцев Александр Николаевич. Морко районысо Семисолаште 1959 ий 30-шо мартыште шочын. Куйбышевысо мединститутым тунем пытарен (1986). Паша корныжо Йошкар-Оласе 2-шо номеран йоча поликлиникыште тӱҥалын. Врач-хирурглан тыршен. 1990 ий гыч – 5-ше номеран йоча поликлиникын вуйлатышыже. 1997 ий гыч – горздрав пӧлка вуйлатышын алмашыже.1999-2014 ийлаште Республикысе йоча больницын тӱҥ врачше. 2014 ий гыч – Йошкар-Оласе округын вуйлатышыже, депутат-влак Погынын председательже. Марий Элын сулло врачше (2004). «За заслуги перед Марий Эл» орденын медальже дене палемдалтын (2009).

50 ий дене Алексей Михеевым.

Михеев Алексей Викторович. Йошкар-Олаште 1969 ий 6-шо мартыште шочын. Тунемме корныжо: Марий кугыжаныш университет (1994), Одо кундемысе шанче шымлыше институт пеленысе аспирантура (1999). Паша корныжо Васильев лӱмеш Марий шанче шымлыше институт дене кылдалтын. 1994 ий гыч археологий отделыште лаборант сомылым шуктен, варажым ты отделым вуйлатен. 2018 ий гыч – «Археология» направлений дене вӱдышӧ шанче сотрудник. 50 утла шанче пашан автор. Историй шанче кандидат (2000).