90 ийым темыше чолгаеҥым:

Николай Савинович Савиновым. Морко районысо Краснояр ялеш 1928 ий 20 декабрьыште шочын. Коркатово ялыште 1954-59 да 1961-69 ийлаште «Ленинград» колхозын председательже, 1978-85 ийлаште – «Путь Ленина» совхозын вуйлатышыже, 1973-78 ийлаште – сельсовет председатель. Марий совхоз-техникумын дипломжо дене (1968), «Знак Почёта» орден дене (1966), «За трудовую доблесть» медаль дене (1973), МАССР-се Верховный Совет Президиумын Чапкагаз дене (1978) палемдалтын.

85 ийым темыше чолгаеҥым:

Леонид Логинович Яндаковым (Яндак). Морко районысо Янситово ялеш 1933 ий 10 декабрьыште шочын. Тунемме корныжо: Моркысо педучилище (1953), Марий кугыжаныш педагогике институт (1958). Волжск районышто туныктен, а 1961 ий гыч ВЛКСМ областной комитетын пашаеҥже. 1965 ий гыч «Марий коммуна» газетын журналистше, 1968 ий гыч – Марий радиошто. «Марий коммуна» газетын Морко районысо собкоржо (1975-94). Пьесе, ойлымаш, очерк-влакын авторжо. «Чоткар» (2000), «Мамич Бердей» (2001), «Онар» (2003-04) роман-влакым возен. У Сугыньым / Новый Завет / марий йылмыш кусарен. Марий Элын сулло журналистше (1994). Марий Элын Кугыжаныш премий дене палемдалтын (2003). Марий Элын калык писательже (2008). Морко районын Почётан гражданинже (2009).

80 ийым темыше чолгаеҥым:

Николай Иванович Шабруковым. Шернур район Изи Кульша ялеш 1938 ий 6 декабрьыште шочын. Шинчымаш корныжо: Йошкар-Оласе фельдшер да акушер школ (1957), Горьковысо мединститут (1964). Паша корныжо Марий Турек районысо больницыште тӱҥалын: 1964 ий гыч – хирург, тӱҥ врачын алмашыже. 1967 ий гыч Советский районысо больницыште: рентгенолог, тӱҥ врач алмашыже, 1977-85 ийлаште – тӱҥ врач. МАССР-се Верховный Советын депутатше (1993). МАССР-ын сулло врачше (1974). «Марий ушемын» районысо пӧлкан председательже, Марий Мер Каҥашын еҥже (1996-2004).

70 ийым темыше чолгаеҥым:

Альбина (Алла) Яковлевна Александровам. Мурманск олаште 1948 ий 17 декабрьыште шочын. Офицерын ӱдыржӧ. 1968 ийын Ленинград оласе хореографий училищым тунем пытарымеке, Шкетан лӱмеш Кугыжаныш музыкально-драматический театрыште. Балерина ятыр тӱҥ партийым куштен. Марий Элын икымше балет примыже. 1990 ийын шке карьерыжым мучашлен, «Водевиль» театрыште тыршаш тӱҥалеш. 1992 ий гыч йоча сымыктыш школышто хореографийым вӱда, 2000 ий гыч опер да балет театрын балетмейстерже. МАССР-се Театр пашаеҥ-влакын ушем вуйлатыше (1985-90). МАССР-се Верховный Советын депутатше (1980-90). МАССР Кугыжаныш премий дене палемдалтын (1973). МАССР да РСФСР-ын сулло артисткыже (1973, 1980). «Знак Почёта» орден (1986). Марий Элын калык артисткыже (2004).

65 ийым темыше чолгаеҥым:

Анатолий Ильич Радыгиным. Одо кундем Алнаш районысо Варали ялеш 1953 ий 7 декабрьыште шочын. Одо кундемысе кугыжаныш университетым заочно тунем пытарен (1986). 1974 ий гыч эл кӧргӧ паша (МВД) верлаште тыршен. Милицийын полковникше (1999). Одо кундемысе марий-влакын ушем вуйлатыше (1996 ий гыч). 2000 ий гыч Марий Мер Каҥашын еҥже (вич созыв). Одо мландыште Марий Элын полномочный представительже (2002 ий гыч). Удмурт Республикын сулло юристше (2002). Удмурт Республикын Чапкагазше дене палемдалтын (2003). Марий Элысе тӱвыран сулло пашаеҥже (2005).

55 ийым темыше чолгаеҥым:

Надежда Ивановна Алатайкинам. Курыкмарий районысо Пинжедыр ялеш 1963 ий 11 декабрьыште шочын. Изинек Килемар районысо Ардыште кушкын. Марий кугыжаныш университетын филологий факультетым пытарымеке (1986), туныктышылан тыршаш тӱҥалын. 2001 ий гыч Арда селасе администраций вуйлатыше. 2005 ийыште Марий кугыжаныш техник университетын кугыжаныш да муниципал управлений факультетым заочно тунем пытарен. Марий Элысе муниципал службын сулло пашаеҥже (2017). 2000-08 ийлаште да 2016 ий гыч Марий Мер Каҥашын еҥже (кум созыв).